XChat пристигнува на iPhone и iPad како нова апликација за допишување, со end-to-end енкрипција и дополнителни безбедносни опции Платформата X подготвува лансирање на нова самостојна апликација за допишување под името XChat. Новата апликација на iPhone и iPad уредите се очекува да се појави веќе во средината на април. Според информациите на порталот 9to5Mac, апликацијата веќе е достапна за преземање преку App Store во форма на претнарачка, со најавен датум на излегување на 17 април. XChat е замислена како издвоена апликација за приватна комуникација во рамки на X екосистемот. Фокусот е ставен на безбедност и едноставност. Описот на апликацијата наведува дека им овозможува на корисниците да се допишуваат со било кого на платформата во „приватен простор за разговор“. За разлика од основната апликација, оваа нема да прикажува реклами ниту да користи следење на корисниците, додека пораките се заштитени со end-to-end енкрипција. Меѓу функциите кои веќе се прикажани во preview верзијата се блокирање на скриншоти, исчезнувачки пораки, групен чат и видео повици. Апликацијата е во развој и фаза на тестирање уште од минатата година. Лансирањето претставува дел од пошироката стратегија на платформата X за унапредување на приватната комуникација и нејзино издвојување во посебен производ.

Популарната апликација за пораки WhatsApp најавува значајни промени кои ќе го променат начинот на кој корисниците ја користат платформата. Компанијата Meta планира постепено воведување на реклами, означувајќи нова фаза во развојот на апликацијата. Според најавите, рекламите нема да се појавуваат во приватните разговори, туку ќе бидат интегрирани во одредени делови од апликацијата, како што се „Status“ (слично на stories) и каналите. Ова значи дека корисниците ќе продолжат да имаат непречена комуникација, додека рекламната содржина ќе биде позиционирана во делови наменети за откривање нови содржини. Од Meta истакнуваат дека приватноста останува приоритет, па пораките и повиците ќе останат заштитени со енкрипција. Сепак, рекламите ќе бидат персонализирани врз основа на основни податоци како локација, јазик и активности во самата апликација. Овој потег се гледа како дел од пошироката стратегија на компанијата да го монетизира огромниот број корисници на WhatsApp, кој брои милијарди ширум светот. До сега, апликацијата беше позната по тоа што беше речиси без реклами, што ја издвојуваше од другите платформи. Експертите сметаат дека воведувањето реклами е неизбежен чекор, но и предизвик – особено кога станува збор за задржување на довербата на корисниците. Како ќе реагира јавноста, останува да се види, но едно е сигурно: WhatsApp влегува во нова ера.

Реклами на WhatsApp официјално доаѓаат и тоа е најголемата промена во историјата на апликацијата откако Meta реши да го отвори просторот за огласи, претплати и платена промоција внатре во самиот сервис. Според официјалната објава на компанијата, новите функции ќе се појавуваат во табот Updates, каде се наоѓаат Status и Channels, а не во приватните разговори. Meta тврди дека личните пораки и повици остануваат заштитени со end-to-end енкрипција и дека нема да се користат за прикажување реклами. Најважната промена е што WhatsApp сега веќе не е само апликација за комуникација, туку и платформа за монетизација. Компанијата најави три нови столба: месечни претплати за канали со ексклузивни содржини, платено промовирање на канали за поголема видливост и реклами во Status, преку кои корисниците ќе можат директно да почнат разговор со бизниси. Meta ова го претставува како промена што нема да ги прекине личните разговори, но суштината е поинаква: WhatsApp влегува во истиот бизнис-модел што одамна ги движи Facebook и Instagram — корисничко внимание претворено во приход. Токму затоа оваа одлука е почувствителна отколку што изгледа на прв поглед. Associated Press потсетува дека основачите Јан Кум и Брајан Ектон кога ја создадоа платформата ветуваа сервис без реклами, а токму таа идеја со години беше дел од посебниот идентитет на WhatsApp. Сега тој идентитет почнува да се менува. Иако рекламите формално се оттурнати од приватните четови, самото влегување на огласувањето во апликацијата значи крај на старата граница што го делеше WhatsApp од останатите Meta-платформи. Meta вели дека за таргетирање ќе користи ограничени податоци како држава или град, јазик, каналите што корисникот ги следи и начинот на кој реагира на рекламите, а за оние што го поврзале WhatsApp со Accounts Center ќе се земаат предвид и рекламските преференции од другите Meta-апликации. Компанијата уверува дека нема да ги продава телефонските броеви и дека групите, пораките и повиците нема да служат за персонализација на рекламите. Но пораката за корисниците е веќе јасна: WhatsApp останува приватен во разговорот, но повеќе не останува невин во бизнисот.